មន្ត្រីយោធាកំពូលរបស់ប្រទេសជប៉ុន សហរដ្ឋអាមេរិក និងកូរ៉េខាងត្បូងបានព្រមព្រៀងគ្នាដើម្បីបន្តរក្សា កិច្ចសហប្រតិបត្តិការ និងការសម្របសម្រួលសន្តិសុខទ្វេភាគី និងពហុភាគីប្រកបដោយប្រសិទ្ធភាព ដើម្បីដោះស្រាយជាមួយនឹងការគំរាមកំហែងមីស៊ីលនិងនុយក្លេអ៊ែររបស់កូរ៉េខាងជើង។នេះបើយោងតាមការចេញផ្សាយរបស់សារព័ត៌មានជប៉ុនក្យូដូចេញផ្សាយកាលពីថ្ងៃសុក្រទី២១ ខែតុលាឆ្នាំ២០២២។
កិច្ចពិភាក្សានេះបានកើតឡើងនៅពេលដែលកូរ៉េខាងជើងបាននឹងកំពុងបាញ់មីស៊ីលផ្លោងក្នុងល្បឿនដែលមិនធ្លាប់មានតាំងពីដើមឆ្នាំនេះមកជាមួយនឹងការរំពឹងទុកថាប្រទេសនេះនឹងអាចអនុវត្តការសាកល្បងនុយក្លេអ៊ែរលើកទីប្រាំពីររបស់ខ្លួនក្នុងពេលឆាប់ៗនេះហើយជាលើកដំបូងចាប់តាំងពីខែកញ្ញាឆ្នាំ២០១៧ ។
ក្នុងជំនួបកាលពីថ្ងៃព្រហស្បតិ៍នៅជិតទីក្រុងវ៉ាស៊ីនតោន ជាមួយសមភាគីជប៉ុនលោកឧត្តមសេនីយ៍ Koji Yamazaki និងឧត្តមសេនីយ៍ Kim Seung Kyum របស់កូរ៉េខាងត្បូង
លោកឧត្តមសេនីយ Mark Milley ប្រធានអគ្គសេនាធិការចម្រុះ បានបញ្ជាក់សារជាថ្មីអំពីការប្តេជ្ញាចិត្តរបស់សហរដ្ឋអាមេរិក ក្នុងការការពារសម្ព័ន្ធមិត្តអាស៊ីបូព៌ាទាំងពីរ។
រដ្ឋាភិបាលបាននិយាយថាការពិភាក្សារបស់មន្ត្រីទាំងបីបានផ្តោតលើបញ្ហាប្រឈមផ្នែកសន្តិសុខក្នុងតំបន់ រួមទាំង សកម្មភាពមីស៊ីលផ្លោងថ្មីៗនិងការអភិវឌ្ឍន៍កម្មវិធីនុយក្លេអ៊ែររបស់កូរ៉េខាងជើង ដែលធ្វើអោយមានអស្ថិរភាពក្នុងតំបន់។
ពួកគេបានយល់ស្របថាសម្ព័ន្ធភាពត្រីភាគីរបស់ពួកគេមានសារៈសំខាន់ក្នុងការរក្សាសន្តិភាព និងស្ថិរភាពក្នុងតំបន់ ហើយបានសន្យាថានឹងបន្តគោលនយោបាយឥណ្ឌូប៉ាស៊ីហ្វិកដោយសេរីនិងបើកចំហដែលជាចក្ខុវិស័យត្រូវបានផ្សព្វផ្សាយដោយប្រទេសជប៉ុននិងសហរដ្ឋអាមេរិកដើម្បីទប់ទល់នឹងឥទ្ធិពលយោធារបស់ចិននៅក្នុងតំបន់។
វាគឺជាការជួបជុំលើកដំបូងរបស់មេទ័ពជាន់ខ្ពស់មកពីប្រទេសទាំងបីចាប់តាំងពីពួកគេបានជួបគ្នានៅហាវ៉ៃកាលពីខែមីនាឆ្នាំនេះ។លោកMilleyបានបញ្ជាក់ជាថ្មីនៅក្នុងកិច្ចប្រជុំទ្វេភាគីជាមួយលោកYamazakiថាសហរដ្ឋអាមេរិកបានប្តេជ្ញាចិត្តចំពោះការការពាររបស់ប្រទេសជប៉ុន រួមទាំងប្រជុំកោះ Senkaku ផងដែរ។
កូនកោះគ្មានមនុស្សរស់នៅដែលគ្រប់គ្រងដោយប្រទេសជប៉ុននៅសមុទ្រចិនខាងកើតត្រូវបានទាមទារដោយប្រទេសចិនដែលហៅពួកគេថា Diaoyu ។