រដ្ឋមន្ត្រីការបរទេសអ៊ុយក្រែន លោក Dmytro Kuleba បានប្រាប់សារព័ត៌មានAPថារដ្ឋាភិបាលរបស់លោកចង់ឱ្យមានកិច្ចប្រជុំកំពូលសន្តិភាពនៅឯអង្គការសហប្រជាជាតិ ដែលមានអគ្គលេខាធិការលោក António Guterres ជាអ្នកសម្រុះសម្រួល។
នៅក្នុងបទសម្ភាសន៍ជាមួយ AP ចេញផ្សាយកាលពីថ្ងៃចន្ទ លោកKulebaបានសារភាពថាខណៈពេលដែលអ៊ុយក្រែននឹងធ្វើអ្វីគ្រប់យ៉ាងដែលខ្លួនអាចធ្វើដើម្បីឈ្នះជម្លោះយោធាដែលកំពុងបន្តជាមួយរុស្ស៊ីនៅឆ្នាំ ២០២៣នោះ ដំណោះស្រាយការទូតនឹងដើរតួយ៉ាងសំខាន់។ លោកKulebaបាននិយាយថារាល់សង្រ្គាមបញ្ចប់ដោយវិធីការទូតហើយការបញ្ចប់សង្រ្គាមវាគឺជាលទ្ធផលនៃសកម្មភាពដែលបានធ្វើឡើងនៅសមរភូមិ និងនៅតុចរចា។
ទាក់ទងទៅនឹងបញ្ហានេះអង្គការសហប្រជាជាតិបានឆ្លើយតបយ៉ាងប្រុងប្រយ័ត្ន។អ្នកនាំពាក្យរងរបស់អង្គការសហប្រជាជាតិ លោក Florencia Soto Nino-Martinez បាននិយាយកាលពីថ្ងៃចន្ទថាដូចដែលអគ្គលេខាធិការបាននិយាយជាច្រើនដងកាលពីអតីតកាល ថាគាត់អាចសម្រុះសម្រួលបានលុះត្រាតែភាគីទាំងអស់ចង់ឱ្យគាត់សម្របសម្រួល។
លោក Kuleba ក៏បាននិយាយដែរថា រុស្ស៊ីត្រូវតែប្រឈមមុខនឹងតុលាការឧក្រិដ្ឋកម្មសង្រ្គាម មុនពេលប្រទេសរបស់លោកជួបពិភាក្សាដោយផ្ទាល់ជាមួយទីក្រុងម៉ូស្គូ។ ទោះជាយ៉ាងណាក៏ដោយ លោកបាននិយាយថាប្រទេសផ្សេងទៀតគួរតែមានអារម្មណ៍សេរីក្នុងការចូលរួមជាមួយរុស្ស៊ីដូចដែលបានកើតឡើងមុនពេលកិច្ចព្រមព្រៀងគ្រាប់ធញ្ញជាតិរវាងតួកគី និងរុស្ស៊ី។
កាលពីដើមខែនេះ ប្រធានាធិបតីអ៊ុយក្រែន លោក វ្ល៉ាឌីមៀ ហ្សេឡិនស្គី បានថ្លែងទៅកាន់មេដឹកនាំ G20 នៅក្នុងប្រទេសឥណ្ឌូណេស៊ី និងបានដាក់ចេញនូវ រូបមន្តសន្តិភាពដប់ចំណុចដែលរួមមានការស្ដារឡើងវិញនូវបូរណភាពទឹកដីរបស់អ៊ុយក្រែន ការដកកងទ័ពរុស្ស៊ី ការដោះដូរអ្នកទោស និងតុលាការសម្រាប់ការចោទប្រកាន់ទីក្រុងម៉ូស្គូ។
ឆ្លើយតបទៅនឹងសំណើរបស់ Kuleba អ្នកនាំពាក្យវិមានក្រឹមឡាំង លោក Dmitry Peskov បានប្រាប់ទីភ្នាក់ងារសារព័ត៌មានរដ្ឋ RIA Novosti ថា រុស្ស៊ី មិនដែលធ្វើតាមលក្ខខណ្ឌដែលកំណត់ដោយអ្នកដទៃឡើយ។ មានតែសុភវិនិច្ឆ័យរបស់យើងតែប៉ុណ្ណោះ៕