អ្នកនាំពាក្យរដ្ឋាភិបាលកំពូលម្នាក់បាននិយាយកាលពីថ្ងៃសុក្រ ទី១៣ខែមករាឆ្នាំ ២០២៣ថាប្រទេសជប៉ុនគ្រោងនឹងចាប់ផ្តើមបញ្ចេញទឹកវិទ្យុសកម្មដែលបានព្យាបាលច្រើនជាងមួយលានតោនពីរោងចក្រថាមពលនុយក្លេអ៊ែរFukushimaដែលខូចដោយរលកយក្សស៊ូណាមិនចូលទៅក្នុងមហាសមុទ្រនៅឆ្នាំនេះ។
ផែនការនេះត្រូវបានអនុម័តដោយទីភ្នាក់ងារថាមពលអាតូមិកអន្តរជាតិ(IAEA)ប៉ុន្តែរដ្ឋាភិបាលនឹងរង់ចាំរបាយការណ៍ដ៏ទូលំទូលាយដោយអ្នកឃ្លាំមើលអង្គការសហប្រជាជាតិជាមុនសិន។
ប្រព័ន្ធត្រជាក់នៅរោងចក្រថាមពលនុយក្លេអ៊ែហ្វូកូស៊ីម៉ា(Fukushima )បានរងការខូចខាតនៅពេលរញ្ជួយដីក្រោមសមុទ្រដ៏ធំមួយបានបង្កឱ្យមានរលកយក្សស៊ូណាមិក្នុងឆ្នាំ ២០១១ដែលបានបង្កឱ្យមានឧបទ្ទវហេតុនុយក្លេអ៊ែរដ៏អាក្រក់បំផុតចាប់តាំងពីរោងចក្រChernobyl ។
គ្រោះមហន្តរាយខែមីនា ឆ្នាំ២០១១ នៅភាគឦសានប្រទេសជប៉ុន បានធ្វើឱ្យមនុស្សប្រហែល ១៨.៥០០នាក់ស្លាប់ ឬបាត់ខ្លួន ដោយភាគច្រើនបានស្លាប់ដោយសាររលកយក្សស៊ូណាមិ។
ដើម្បីធានាថាការបង្ហូរទឹកនេះស្របតាមស្តង់ដារសុវត្ថិភាពអន្តរជាតិ និងមិនបង្កគ្រោះថ្នាក់ដល់សុខភាពសាធារណៈ និងបរិស្ថានទីភ្នាក់ងារថាមពលបរមាណូអន្តរជាតិបានកំពុងធ្វើការត្រួតពិនិត្យសុវត្ថិភាពនៃផែនការនេះ។
ទីភ្នាក់ងារនឹងចេញរបាយការណ៍ដ៏ទូលំទូលាយមួយ ដោយផ្អែកលើការរកឃើញរបស់ពួកគេ និងផ្តល់ការគាំទ្រមុន អំឡុងពេល និងបន្ទាប់ពីការបង្ហូរទឹកចេញ។
ប្រធានខុទ្ទកាល័យលោក Hirokazu Matsuno បាននិយាយនៅក្នុងកិច្ចប្រជុំថាយើងចង់ពន្យល់ឱ្យបានហ្មត់ចត់នូវវិធានការទាំងនេះដល់សហគមន៍នេសាទ និងភាគីពាក់ព័ន្ធផ្សេងទៀតនិង ស្តាប់កង្វល់របស់ពួកគេ។
យោងតាមគោលនយោបាយដែលបានកែសម្រួល រដ្ឋាភិបាលនឹងជួយអ្នកនេសាទដែលភ័យខ្លាចការខូចខាតកេរ្តិ៍ឈ្មោះនឹងប៉ះពាល់ដល់ការលក់ត្រីរបស់ពួកគេតាមរយៈមូលនិធិថ្មីចំនួន ៥០ពាន់លានយ៉េន ស្មើនឹងជាង៣៨៥លានដុល្លារ៕