សួស វីសា ៖ថៅកែនៅមិនទាន់ធ្វើឲ្យរំភើបវិញ

ភ្នំពេញ៖សួស វីសា បានវិលត្រឡប់មករកឆាកតន្រ្ដីសារជាថ្មីវិញយ៉ាងពេញទំហ៊ឹងទៅហើយ បើទោះជាជំងឺ​រលាកបំពង់កនាងនៅមិនទាន់មានការបញ្ជាក់ពីទេព្យថៃថានាងជា១០០%វិញក្ដី ប៉ុន្ដែខែនេះជារដូវផ្ការីក​សម្រាប់​តារាសិល្បៈទាំងឡាយទើបវីសា មិនអាចពន្យាពេលការចេញ​រកលុយទៀតនោះទេ ហើយមានឆាកខ្លះ​រូបនាង​ថែម​ទាំងនាំស្វាមីនាងលោកថមមី ទៅច្រៀង​រាំ​ជាមួយទៀតផង ដែលនោះគឺជាការបន្ថែមប្រាក់ចំណូល​ឬអាជីព​ថ្មីឲ្យប្ដី ខណៈដែលកន្លង​មក​លោកប៊ុនថុល ប៊ុនថង ធ្វើគ្រប់យ៉ាងដើម្បីភរិយាក្នុងនោះមានទាំងការតែង​ខ្លួនជា​ភេទ​ទី៣​ដើ​ម្បី​​លក់​អ៊ឺវ៉ាន់តាមOnline ទៀតផង។

អ្វីដែលគូរឲ្យកត់សម្គាល់អំឡុងពេលដែលវីសា កាន់​ក្បាល​មី​ក្រូពេញជាថ្មីនេះដែរ នាងនៅមិនទាន់ទទួលបាន​តំណែងធំណាមួយពីថៅកែ​ហង្សមាសដើ​ម្បី​លួងលោមចិត្តនាងវិញឡើយក្រោយពីរបូតកៅអីជាCoach កម្មវិធី​The Voice Kids Cambodia​ រដូវ​កាលទី៣ ដែលត្រូវសុគន្ធ និសា រ៉ាប់រងវិញ។ប៉ុន្ដែគេជឿរថាវីសា នៅតែ​មាន​ឱ​កាស​ព្រោះការចាកចេញរបស់លោកខែម ប៊ុនថៃ ធ្វើឲ្យកៅអីមួយចំនួនដែលថៅកែ​ត្រៀមប្រ​គល់​​ទៅ​ឲ្យអតីតតារា​ហង្ស​មាសរូបនេះរ៉ាប់រងបាននៅទំនេរនៅឡើយ បើទោះជាពេជ្រ សោភា ហាក់មានប្រៀបជាងក្នុងការ​ទទួលបាន​ការ​ងារ​ទាំងនោះក្ដី។

 សួស វីសា បានច្រៀងផង ដើរលេងផងនៅចុងឆ្នាំ២០២២ និងដើមឆ្នាំ២០២៣ នេះ​ដោយនាងបាននាំស្វាមី​និងកូន​ស្រីទៅដើរកម្សាន្ដនៅក្រៅប្រទេសជាបន្ដបន្ទាប់ តែទៅ​តែ​ក្នុងតំបន់អាស៊ីប៉ុណ្ណោះមានដូចជាថៃ និងសាំងហ្គាពួរ ជាដើម។អ្វីដែលវីសា មិនទាន់បាន​សម្រេ​​ចតាមបំណងនៅឡើយកាលពីឆ្នាំចាស់​នោះគឺនាងចង់ជិះ​រថយន្ដម៉ាក​Rolls Royce ហេតុនេះហើយ​តាមរយៈការចេញច្រៀងទាំងសុខភាពមិនសូវអំណោយផល ហើយស្វាមីនាង​នៅតែ​តែងខ្លួន​ជាភេទទី៣ ដើម្បីប្រឹងរកលុយរួមគ្នា នោះមិនយូទេវីសា នឹងបានជិះឡាន​ម៉ាក​សេដ្ឋីនោះ​ជាមិន​ខាន​ឡើយ ខណៈ​ដែលពេលនេះនាងមានរថយន្ដជាច្រើនគ្រឿងជិះ ឆ្លាស់គ្នា​ប្រចាំថ្ងៃមានដូច ជាLexus Lx570,Lexus Nx200t ,Alphard ,Jaguar,Bmw និងMazda ជាដើម។

ប៉ុន្ដែទាក់ទង អាជីព​ចម្រៀងវិញការត្រឡប់មកអុកឡុកទីផ្សារជាថ្មីនេះវីសា ក៍មិនខុស​ពីតារាដែលមានស្វាមី​និង​កូន​​ដ៍ទៃទៀតដែរ ពោលគឺពិបាកយកឈ្នះគូប្រជែង ហើយចំណុច​នេះ​នាងបានដឹងខ្លួន តាំង​ពីមុនរៀប​ការប្ដី​កាល​ពីឆ្នាំ២០១៩ ម្លេះ។ប្រភពបានឲ្យដឹងថាវីសា អាច​នឹង​ទៅធ្វើជាគ្រូ​បង្វឹក​​កម្មវិធី​X Factor ​Cambodia រដូវកាលទី២ជំ​នួសលោកប៊ុនថៃ ប៉ុន្ដែ​កៅអីធំនេះស្ថិតនៅ​លើការ​សម្រេចចិត្តរបស់លោកឧកញ៉ាអ៊ឹង ឆៃងួន ថៅកែហង្សមាស និង​​លោកអ៊ឹង សុខលី ស្វាមីឱក សុគន្ធកញ្ញា ៕