ខេត្តហ៊ូណាន (ចិន) ៖ ប្រទេសចិន បានជួសជុលទំនប់បឹងដុងធីង (Dongting) ដែលជាបឹងធំទីពីរក្នុងប្រទេស បានរួចរាល់ហើយ ត្រឹមតែប៉ុន្មានថ្ងៃ បន្ទាប់ពីការបាក់ទំនប់ បណ្តាលឲ្យមនុស្សរាប់ពាន់ នាក់ត្រូវជម្លៀសចេញ។តាមប្រភពទីភ្នាក់ងារព័ត៌មានស៊ីនហួរ បុគ្គលិកសង្គ្រោះជនជាតិចិន រាប់រយនាក់ បំពាក់ដោយឧបករណ៍ ឡានដឹកថ្ម និងទូកជាច្រើនគ្រឿង បានអនុវត្តការងារជួសជុលទំនប់បឹងដុងធីង ដែលបាក់ នៅក្នុងស្រុកហួរ៉ុង (Hua Rong) ខេត្តហ៊ូណាន (Hunan) បានដោយជោគជ័យ នូវផ្នែកដែលបាក់ដាច់ ប្រវែង ២២៦ម៉ែត្រ នៅម៉ោង ១០:៣១នាទីយប់ ថ្ងៃទី០៨ ខែកក្កដា ឆ្នាំ២០២៤ ម៉ោងក្នុងស្រុក។
![](https://norkorthom.com/wp-content/uploads/2024/07/c2-34.jpg)
គួរបញ្ជាក់ថា ទំនប់បឹងដុងធីង ដែលជាបឹងទឹកសាបធំទីពីរ នៅក្នុងប្រទេសចិន ស្ថិតនៅស្រុក ហួរ៉ុង ទីក្រុងយេយ៉ាង ខេត្តហ៊ូណាន ភាគកណ្តាលប្រទេសចិន បានបាក់ដាច់ កាលពីថ្ងៃសុក្រទី០៥ ខែកក្កដា ឆ្នាំ២០២៤ បង្ខំឱ្យមានការជម្លៀសប្រជាជនរាប់ពាន់នាក់ ដែលនៅក្បែរនោះ ចេញពីលំនៅឋាន ដើម្បីចៀសវាងគ្រោះថ្នាក់ជាយថាហេតុ។
![](https://norkorthom.com/wp-content/uploads/2024/07/c3-29.jpg)
នៅរសៀលថ្ងៃទី០៥ ខែកក្កដា ឆ្នាំ២០២៤ ប្រជាជននៅភាគកណ្តាលប្រទេសចិន មានការភ័យស្លន់ស្លោ ពេលបានឮដំណឹងអំពីការបាក់ទំនប់បឹងដុងធីង ដែលបណ្តាលឲ្យមានបរិមាណទឹកយ៉ាងច្រើនហូរចេញពីបឹង ហើយអាជ្ញាធរត្រូវជម្លៀសមនុស្សជិត ៦០០០នាក់ ចេញពីតំបន់នោះជាបន្ទាន់។
![](https://norkorthom.com/wp-content/uploads/2024/07/c1-46.jpg)
តាមប្រភពទីភ្នាក់ងារព័ត៌មានស៊ីនហួរ ឲ្យដឹងថា ក្រសួងគ្រប់គ្រងគ្រោះមហន្តរាយរបស់ប្រទេសចិន បានបញ្ជូនមន្ត្រីជាង ៨០០នាក់ រថយន្តជិត ១៥០គ្រឿង និងនាវារាប់សិបគ្រឿង ដើម្បីពន្លឿនការជួសជុលទំនប់ដែលបាក់ខូច និងប្រតិបត្តិការជួយជនរងគ្រោះ ក្រោយការបាក់ទំនប់ បណ្តាលឱ្យមានទឹកជំនន់ភ្លាមៗ៕ ខៀវទុំ