បាងកក (ថៃ) ៖ នៅថ្ងៃទី២១ ខែសីហា ឆ្នាំ២០២៤ មានសេចក្តីរាយការណ៍ថា ទំព័រហ្វេកប៊ុករបស់នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាលថៃ បានចុះផ្សាយថា បានរៀបចំធ្វើសន្និសីទសារព័ត៌មាន ស្តីពីការរកឃើញអ្នកផ្ទុកជំងឺអុតស្វាទី១ នៅប្រទេសថៃ ជាជនជាតិអឺរ៉ុប ធ្វើដំណើរមកពីអាហ្រ្វិក ។
អគ្គនាយកនៃនាយកដ្ឋានប្រយុទ្ធនឹងជំងឺឆ្លង បង្ហាញពីរោគសញ្ញាចុងក្រោយនៃករណីសង្ស័យដំបូងនៃជំងឺអុតស្វា ទី១ នៅប្រទេសថៃ ដែលត្រូវបានរកឃើញ ជាជនជាតិអឺរ៉ុប។ គេរំពឹងថាថ្ងៃសុក្រ ទី២៣ ខែសីហា ឆ្នាំ២០២៤ ខាងមុខនេះ វានឹងត្រូវបានបញ្ជាក់ថា តើវាជាប្រភេទអ្វី?
លោកវេជ្ជបណ្ឌិត ថុងឆ័យ គីរទិហត្ថយ៉ាកន អគ្គនាយកនៃនាយកដ្ឋានប្រយុទ្ធនឹងជំងឺឆ្លង បានឲ្យដឹងនៅថ្ងៃទី២១ ខែសីហា ឆ្នាំ២០២៤ ថា អ្នកជំងឺនេះ បានធ្វើដំណើរទៅប្រទេសថៃ នៅថ្ងៃទី ១៤ ខែសីហា ឆ្នាំ២០២៤ វេលាម៉ោង ៦និង០០នាទីល្ងាច ដោយមានប្រវត្តិមកពីប្រទេសអាហ្វ្រិក មានការផ្ទុះឡើងនៃជំងឺអុតស្វា Clade 1B ដែលត្រូវបានផ្ទេរតាមយន្តហោះទៅកាន់មជ្ឈិមបូព៌ា មុនពេលធ្វើដំណើរទៅប្រទេសថៃ។ ក្រោយមកនៅថ្ងៃទី១៥ ខែសីហា ឆ្នាំ២០២៤ អ្នកជំងឺចាប់ផ្តើមក្តៅខ្លួន និងមានពងបែកមួយចំនួន មុនពេលធ្វើដំណើរទៅមន្ទីរពេទ្យ ក្រោយពីធ្វើរោគវិនិច្ឆ័យរួច ក៏សង្ស័យថាជាជំងឺអុតស្វា។
លោកវេជ្ជបណ្ឌិត ដដែលបញ្ជាក់ថា «ទោះបីជាវាមិនទាន់ប្រាកដ 100% ប៉ុន្តែយើងចាំបាច់ត្រូវតែផ្តល់ព័ត៌មានដល់សាធារណជន ដើម្បីដឹងថាមានអ្នកជំងឺដែលសង្ស័យមានជំងឺអុតស្វា ដែលមកពីបរទេស សម្រាប់ប្រព័ន្ធតាមដានទំនាក់ទំនងអ្នកដែលអង្គុយជិតមនុស្សឈឺ នៅលើយន្តហោះ។ យើងបាននិងកំពុងស៊ើបអង្កេត ដើម្បីគ្រប់គ្រងជំងឺ និងតាមដាន។ គេអាចមើលឃើញថា អ្នកជំងឺនេះ បន្ទាប់ពីចុះពីយន្តហោះ មានរយៈពេលខ្លីណាស់ក្នុងការប្រាស្រ័យទាក់ទងជាមួយមនុស្សផ្សេងទៀត ព្រោះមកដល់ថៃ ម៉ោង៦ល្ងាច ហើយថ្ងៃបន្ទាប់ ទៅជួបពេទ្យ ហើយបន្ទាប់មក នៅមន្ទីរពេទ្យ ដែលបានបញ្ជូនក្រុមស៊ើបអង្កេតជំងឺ និងស្វែងរកទំនាក់ទំនង តាមដានជាមួយអ្នកមានទំនាក់ទំនងរយៈពេលប្រហែល ២១ថ្ងៃ ដើម្បីដឹងពីរោគសញ្ញាដែលពួកគេមាន។ ទាំងអស់នេះ គឺជាប្រ ព័ន្ធគ្រប់គ្រងនិងបង្ការជំងឺ របស់នាយកដ្ឋានគ្រប់គ្រងជំងឺឆ្លង ប្រទេសថៃ»៕