អ៊ីស្រាអែល ៖ អ៊ីស្រាអែល និងក្រុមហេសបូលឡាហ៍ បានបន្តការវាយប្រហារឆ្លងព្រំដែនរបស់ពួកគេឡើងវិញ ក្រោយបញ្ចប់សន្តិភាពរយៈពេលខ្លី បន្ទាប់ពីមានការវាយប្រហារសងសឹកគ្នា ដោយភាគីទាំងពីរ កាលពីថ្ងៃទី២៥ ខែសីហា ឆ្នាំ២០២៤។
ទីភ្នាក់ងារព័ត៌មានបរទេស បានរាយការណ៍នៅថ្ងៃទី២៧ ខែសីហា ឆ្នាំ២០២៤ ថា អ៊ីស្រាអែល និងក្រុមហេសបូលឡាហ៍ នៅប្រទេសលីបង់ បានបើកការវាយប្រហារគ្នាយ៉ាងខ្លាំងក្លា ឆ្លងព្រំដែន កាលពីព្រឹកថ្ងៃអាទិត្យ និងបន្តនៅថ្ងៃចន្ទ ទី២៦ ខែសីហា ឆ្នាំ២០២៤។
ប្រព័ន្ធផ្សព្វផ្សាយក្នុងស្រុកលីបង់ បាននិយាយថា អ៊ីស្រាអែល បានបន្តការវាយលុករបស់ខ្លួនលើប្រទេសលីបង់ នៅរសៀលថ្ងៃទី២៦ ខែសីហា ឆ្នាំ២០២៤ ពួកគេបានកំណត់គោលដៅភូមិជាប់ព្រំដែននៃក្រុងតារហាហ្វា និងក្រុងស៊ីដូន តំបន់ឆ្នេរ បណ្តាលឱ្យខូចខាតរថយន្ត ១គ្រឿង តែបុរសម្នាក់ ដែលជាសមាជិកនៃអាជ្ញាធរប៉ាឡេស្ទីន បានរួចជីវិតពីការវាយប្រហារលើរថយន្ត។ បន្ទាប់មក ក្រុមហេសបូលឡាហ៍ បានប្រកាសថា ពួកគេបានបញ្ជូនយន្តហោះដ្រូន ផ្ទុកគ្រាប់បែក ទៅវាយប្រហារឧបករណ៍កងទ័ពអ៊ីស្រាអែល នៅភាគខាងជើងប្រទេសអ៊ីស្រាអែល។
នៅព្រឹកថ្ងៃទី២៥ ខែសីហា ឆ្នាំ២០២៤ អ៊ីស្រាអែល បានពង្រាយយន្តហោះចម្បាំង ទ្រង់ទ្រាយធំ វាយប្រហារលើគោលដៅជាង៤០ នៅភាគខាងត្បូងប្រទេសលីបង់ ដែលគេអះអាងថា វាជាការប៉ុនប៉ងដើម្បីកម្ទេចគ្រាប់រ៉ុក្កែត ដែលក្រុមហេសបូលឡាហ៍ នឹងប្រើដើម្បីវាយប្រហារពួកគេ សងសឹកអ៊ីស្រាអែល ដែលបានសម្លាប់មេបញ្ជាការជាន់ខ្ពស់បំផុតរបស់ពួកគេ គឺលោក ហ៊្វូអាដ ស៊ុក (Fouad Shukr) កាលពីចុងខែកក្កដា ឆ្នាំ២០២៤។ ប៉ុន្តែមួយម៉ោងក្រោយមក ក្រុមហេសបូលឡាហ៍ (Hezbollah) បានបាញ់រ៉ុក្កែត រាប់រយគ្រាប់ និងបញ្ជូនយន្តហោះគ្មានមនុស្សបើកជាង ១០០គ្រឿង ទៅវាយប្រហារតំបន់ផ្សេងៗនៃប្រទេសអ៊ីស្រាអែល ដើម្បីសងសឹក។ ទន្ទឹមនឹងនេះ មេដឹកនាំក្រុមហេសបូលឡាហ៍ លោក ហាសសាន់ ណាស្រាលឡាហ៍ (Hassan Nasrallah) បានអះអាងថា ការវាយប្រហារដោយយន្តហោះគ្មានមនុស្សបើក ធ្វើឡើងដោយមូលដ្ឋានចារកម្មអ៊ីស្រាអែល នៅជិតទីក្រុង តេលអាវីវ (Tel Aviv) ប៉ុន្តែអ៊ីស្រាអែល បានបដិសេធ៕