ដោះលែងចិន បើកឡានបុ…/កផ្ទះខ្មែរ តុលាការខេត្តព្រះសីហនុ បំភ្លឺ

ខេត្តព្រះសីហនុៈ អ្នកនាំពាក្យនៃអយ្យការអមសាលាដំបូងខេត្តព្រះសីហនុ នៅថ្ងៃទី១១ ខែឧសភា ឆ្នាំ២០២៥ បានចេញសេចក្តីប្រកាសព័ត៌មាន ស្តីពីការដោះលែងអ្នកបើកបរថយន្ត ជាជនជាតិចិន ឲ្យនៅក្រៅឃុំជាបណ្តោះអាសន្ន ពាក់ព័ន្ធករណីគ្រោះថ្នាក់ចរាចរណ៍ បង្កឡើងដោយរថយន្ត ១គ្រឿង ម៉ាក HYUDAI STAREX ពណ៌ខ្មៅ ពាក់ស្លាកលេខ ភ្នំពេញ 2AZ-7908 បើកបរដោយឈ្មោះ ZHANG CHANG XIN ភេទប្រុស អាយុ២៦ឆ្នាំ ជនជាតិចិន បើកបុករបងទ្វារផ្ទះ និងរថយន្តដែលចតក្នុងបរិវេណផ្ទះ បណ្តាលឱ្យរងការខូចខាត។

អ្នកនាំពាក្យនៃអយ្យការអមសាលាដំបូងខេត្តព្រះសីហនុ បានបញ្ជាក់ថា នៅថ្ងៃទី៨ ខែឧសភា ឆ្នាំ២០២៥ អយ្យ​ការអមសាលាដំបូងខេត្តព្រះសីហនុ បានទទួលនិងចាត់ការសំណុំរឿងព្រហ្មទណ្ឌ ពាក់ព័ន្ធនឹងករណីគ្រោះថ្នាក់ចរាចរណ៍ បើកបរដោយធ្វេសប្រហែស ខ្ជីខ្ជា ខ្វះការប្រុងប្រយ័ត្ន និងមិនគោរពកាតព្វកិច្ចក្នុងការបើកបរ ទៅបុករបងទ្វារផ្ទះ និងរថយន្តដែលចតក្នុងបរិវេណផ្ទះ បណ្តាលឱ្យរងការខូចខាត (ផ្នែកសម្ភារៈ) កើតហេតុនៅថ្ងៃ​ទី៦ ខែឧសភា ឆ្នាំ២០២៥ វេលាម៉ោង០៣ និង៤០នាទីទៀបភ្លឺ ស្ថិតក្នុងក្រុមទី៩ ភូមិ៣ សង្កាត់លេខ៣ ក្រុងព្រះ​សីហនុ ខេត្តព្រះសីហនុ (ចំណុចផ្ទះជនរងគ្រោះឈ្មោះជា ស៊ីនឿន ភេទប្រុស អាយុ៥៧ឆ្នាំ ជនជាតិខ្មែរ)។

ករណីគ្រោះថ្នាក់ចរាចរណ៍នេះ បង្កឡើងដោយរថយន្ត ១គ្រឿង ម៉ាក HYUDAI STAREX ពណ៌ខ្មៅ ពាក់ស្លាក​លេខ ភ្នំពេញ 2AZ-7908 បើកបរដោយឈ្មោះ ZHANG CHANG XIN ភេទប្រុស អាយុ២៦ឆ្នាំ ជនជាតិចិន មានទិសដៅពីជើង ទៅត្បូង។ លុះមកដល់ចំណុចកើតហេតុខាងលើ អ្នកបើកបររថយន្តដែលស្ថិតក្នុងស្ថានភាពស្រវឹង បានបើកបុករបងទ្វារផ្ទះ ចូលក្នុងផ្ទះប្រជាពលរដ្ឋ ១កន្លែង ដែលមានម្ចាស់ផ្ទះឈ្មោះជា ស៊ីនឿន ជាជន​ជាតិខ្មែរ។ ហេតុការណ៍គ្រោះថ្នាក់ចរាចរណ៍នេះ បានបណ្តាលឱ្យរបងទ្វារផ្ទះ ១ផ្ទាំង បានបាក់ខូចខាត ហើយបានបន្តជ្រុលទៅបុករថយន្ត ១គ្រឿង ម៉ាក TOYOTA RALLY ពណ៌ស ផលិតឆ្នាំ២០២២ ពាក់ស្លាកលេខ ព្រះសី​ហនុ 2D-1233 ដែលចតនៅក្នុងបរិវេណរបងផ្ទះ បណ្តាលឱ្យផ្នែកខាងក្រោយនៃរថយន្ត រងការខូចខាត ហើយផ្នែកខាងមុខនៃរថយន្ត ក៏បានរងការខូចខាតដែរ ដោយសារការបុក ធ្វើឱ្យរថយន្តរំកិលទៅមុខ បុកនឹងជញ្ជាំងផ្ទះ។

បន្ទាប់ពីបានកើតហេតុរួចភ្លាមៗ កម្លាំងសមត្ថកិច្ចនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តព្រះសីហនុ បានចុះទៅដល់ទីតាំងកើតហេតុ ដើម្បីធ្វើការត្រួតពិនិត្យ វាស់វែង និងបានធ្វើការឃាត់ខ្លួនជន​សង្ស័យ ជាអ្នកបើកបររថយន្ត ម៉ាក HYUNDAI STAREX ឈ្មោះ ZHANG CHANG XIN និងបានដកហូតវត្ថុតាងរថយន្ត បញ្ជូនទៅកាន់ការិយាល័យនគរបាលចរាចរណ៍ផ្លូវគោក ដើម្បីចាត់ការបន្តតាមនីតិវិធី។

ក្រោយការឃាត់ខ្លួន សមត្ថកិច្ចនគរបាលចរាចរណ៍ផ្លូវគោក បានធ្វើតេស្តជាតិស្រវឹងក្នុងខ្លួនអ្នកបើកបររថយន្តខាងលើ ដោយលទ្ធផលបានបង្ហាញឱ្យឃើញថា ជននេះមានកម្រិតជាតិអាល់កុលក្នុងខ្លួន ចំនួន 0,58mg/L ហើយសមត្ថកិច្ចនគរបាលចរាចរណ៍ផ្លូវគោក បានឱ្យសមត្ថកិច្ចជំនាញការិយាល័យនគរបាលប្រឆាំងគ្រឿង​ញៀន ធ្វើតេស្តទឹកនោម រកសារធាតុញៀនក្នុងខ្លួនជននេះ ដោយលទ្ធផល អវិជ្ជមាន។

គួរបញ្ជាក់ដែរថា ជនសង្ស័យឈ្មោះ ZHANG CHANG XIN ពុំមានប័ណ្ណបើកបរយានយន្ត នៅជាប់នឹងខ្លួនឡើយ។

ក្រោយពីមន្ត្រីនគរបាលចរាចរណ៍ផ្លូវគោក បានស្តាប់ចម្លើយលើជនសង្ស័យឈ្មោះ ZHANG CHANG XIN និងពិនិត្យភ័ស្តុតាង ឃ្លីបវីឌីអូ ពីកាមេរ៉ាសុវត្ថិភាព រួចមក សមត្ថកិច្ចជំនាញបានសន្និដ្ឋានថា ហេតុការណ៍ដែលបានកើតឡើង គឺបង្កឡើងដោយឈ្មោះ ZHANG CHANG XIN បានបើកបររថយន្តដោយធ្វេសប្រហែស ខ្ជីខ្ជា ខ្វះការប្រុងប្រយ័ត្ន និងមិនគោរពកាតព្វកិច្ចក្នុងការបើកបរ ទៅបុករបងទ្វារផ្ទះ និងរថយន្តដែលចតក្នុងបរិវេណផ្ទះ បណ្តាលឱ្យរងការខូចខាត ដែលបញ្ញត្តិច្បាប់បានកំណត់ថា ឈ្មោះ ZHANG CHANG XIN បានបំពានជំពូក ១០ មាត្រា ៧៥ និងមាត្រា ៧៧ ចំណែកម្ចាស់កម្មសិទ្ធិករនៃរថយន្តបង្កឈ្មោះជឿន ម៉េងលុយ បានបំពានជំពូក១០ មាត្រា ៧២នៃច្បាប់ស្តីពីចរាចរណ៍ផ្លូវគោក ក្នុងព្រះរាជាណាចក្រកម្ពុជា។

ចំពោះការពាក់ព័ន្ធនឹងអំពើល្មើស តាមស្មារតីច្បាប់ស្តីពីចរាចរណ៍ផ្លូវគោក ជនសង្ស័យឈ្មោះ ZHANG CHANG XIN បានបំពាននឹង ជំពូក ១០ មាត្រា ៧៥ គឺត្រូវរងពិន័យអន្តរការណ៍ ជាប្រាក់ចំនួន ១ ២០០ ០០០រៀល និងមាត្រា ៧៧ គឺត្រូវរងពិន័យអន្តរការណ៍ ជាប្រាក់ចំនួន ២ ០០០ ០០០រៀល ចំណែកម្ចាស់កម្មសិទ្ធិករនៃរថយន្ត ឈ្មោះ ជឿន ម៉េងលុយ បានបំពានជំពូក ១០ មាត្រា ៧២ ដែលជាអ្នកទទួលខុសត្រូវផ្នែក រដ្ឋប្បវេណី តាមច្បាប់ស្តីពីចរាចរណ៍ផ្លូវគោក។ មួយវិញទៀត ដោយហេតុថា ជនសង្ស័យឈ្មោះ ZHANG CHANG XIN មិនមានលទ្ធភាពក្នុងការបង់ប្រាក់ពិន័យអន្តការណ៍តាមច្បាប់ និងសងសំណងទៅជនរងគ្រោះ ដូចនេះមន្ត្រីនគរបាលចរាចរណ៍ផ្លូវគោក បានបញ្ជូនសំណុំរឿងជនសង្ស័យ ព្រមទាំងវត្ថុតាង (រថយន្តបង្កហេតុ) មកអយ្យការអមសាលាដំបូងខេត្តព្រះសីហនុ ដើម្បីចាត់ការបន្តតាមនីតិវិធី។

ក្រោយពីតំណាងអយ្យការ បានទទួលនិងពិនិត្យលើសំណុំរឿងខាងលើ ព្រមទាំងផ្អែកទៅលើភ័ស្តុតាងពាក់ព័ន្ធនៅក្នុងសំណុំរឿងនេះ តំណាងអយ្យការ បានអញ្ជើញមន្ត្រីនគរបាលយុត្តិធម៌ ដើម្បីមកធ្វើការបំភ្លឺបន្ថែម និងធ្វើការស្តាប់ចម្លើយជនសង្ស័យ។ បន្ថែមលើពីនេះ តំណាង អយ្យការ បានអញ្ជើញភាគីជនរងគ្រោះ ដើម្បីស្តាប់ការបំភ្លឺបន្ថែម ព្រមទាំងផ្តល់ពេលវេលាសមល្មមតាមនីតិវិធី ឱ្យភាគីរថយន្តបង្កហេតុ និងភាគីជនរងគ្រោះ បានជួបគ្នាក្នុងការសម្របសម្រួល ដោះស្រាយលើផ្នែកសំណងនៃការខូចខាត ប៉ុន្តែភាគីទាំងពីរ ចរចាមិនត្រូវរ៉ូវគ្នា អំពីសំណងទេ។ បន្ទាប់ពីតំណាងអយ្យការបានពិនិត្យលើអង្គហេតុនិងអង្គច្បាប់ តំណាងអយ្យការ រកឃើញថា អំពើរបស់ជនសង្ស័យឈ្មោះ ZHANG CHANG XIN ជាបទល្មើសដែលមានចែងក្នុងច្បាប់ស្តីពីចរាចរណ៍ផ្លូវគោក តាមបញ្ញត្តិមាត្រា ៧៥ និងមាត្រា ៧៧ នៃច្បាប់ស្តីពីចរាចរណ៍ផ្លូវគោក ដែលបទល្មើស ត្រូវទទួលរងពិន័យអន្តរការណ៍។

ចំណែកឯម្ចាស់កម្មសិទ្ធិករនៃរថយន្ត ឈ្មោះជឿន ម៉េងលុយ ដែលជាអ្នកទទួលខុសត្រូវផ្នែករដ្ឋប្បវេណី ល្មើសនឹងមាត្រា ៧២ តាមច្បាប់ស្តីពីចរាចរណ៍ផ្លូវគោក។ ហេតុដូចនេះ ផ្អែកលើទិដ្ឋភាពច្បាប់ លើអំពើល្មើសដែលត្រូវទទួលរងពិន័យអន្តរការណ៍ និងការទទួលខុសត្រូវផ្នែក រដ្ឋប្បវេណី តាមច្បាប់ស្តីពីចរាចរណ៍ផ្លូវគោក តំណាងអយ្យការ បានសម្រេចអនុញ្ញាតឱ្យជនសង្ស័យឈ្មោះ ZHANG CHANG XIN ត្រឡប់ទៅវិញ ជាបណ្តោះអាសន្ន និងបញ្ជូនសំណុំរឿងនេះទៅជំនុំជម្រះតាមនីតិវិធី ដើម្បីសម្រេចអំពីការពិន័យលើជនសង្ស័យ និងសំណងដល់ជនរងគ្រោះ នាពេលខាងមុខ៕