សហរដ្ឋអាមេរិក ៖ លោកដូណាល់ ត្រាំ (Donald Trump) ប្រធានាធិបតីសហរដ្ឋអាមេរិក បាននិយាយជាមួយលោក វ្ល៉ាឌីមៀរ ពូទីន (Vladimir Putin) តាមទូរស័ព្ទ ជិត ២ម៉ោង អំពីសង្រ្គាមនៅអ៊ុយក្រែន។ មេដឹកនាំអាមេ រិក បានអះអាងថា ភាគីទាំងពីរនឹងចាប់ផ្តើមការចរចាបទឈប់បាញ់ភ្លាមៗ។
តាមប្រភពទីភ្នាក់ងារព័ត៌មានបរទេស បានរាយការណ៍នៅថ្ងៃទី២០ ខែឧសភា ឆ្នាំ២០២៥ ថា លោក ដូណាល់ ត្រាំ ប្រធានាធិបតីសហរដ្ឋអាមេរិក បាននិយាយតាមទូរស័ព្ទ ជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន អស់រយៈពេលជាងពីរម៉ោង នៅថ្ងៃចន្ទ ទី១៩ ខែឧសភា ឆ្នាំ២០២៥ ដើម្បីស្វែងរកមធ្យោបាយបញ្ចប់សង្រ្គាមនៅអ៊ុយក្រែន។ លោកត្រាំ បានអះអាងថា រុស្ស៊ី និងអ៊ុយក្រែន នឹងចាប់ផ្តើមការចរចាបទឈប់បាញ់ ជាបន្ទាន់។លោកត្រាំ បានបង្ហោះនៅលើបណ្តាញ Truth Social បន្ទាប់ពីការសន្ទនារបស់គាត់ជាមួយលោកពូទីន ថា «ការសន្ទនាតាមទូរស័ព្ទនេះ ដំណើរការល្អណាស់។ សំឡេងនិងអារម្មណ៍នៃការសន្ទនា គឺល្អណាស់»។
មេដឹកនាំអាមេរិក បញ្ជាក់ថា រុស្ស៊ី-អ៊ុយក្រែន នឹងចាប់ផ្តើមការចរចាភ្លាមៗ ឆ្ពោះទៅរកបទឈប់បាញ់ ហើយសំខាន់ជាងនេះទៅទៀត ការនាំឲ្យសង្រ្គាមនេះបញ្ចប់ លក្ខខណ្ឌនៃបទឈប់បាញ់ នឹងត្រូវចរចារវាងរុស្ស៊ី និងអ៊ុយក្រែន ព្រោះគេដឹងព័ត៌មានលម្អិតនៃការចរចាដែលគ្មាននរណាម្នាក់ដឹង។
លោកដូណាល់ ត្រាំ មិនបាននិយាយថា តើបទឈប់បាញ់ រវាងរុស្ស៊ី និងអ៊ុយក្រែន នឹងកើតឡើងនៅពេលណានោះទេ។ ប៉ុន្តែលោកបានបញ្ជាក់ថា ការចរចា អាចនឹងធ្វើឡើងនៅបុរីវ៉ាទីកង់។
លោកត្រាំ ថ្លែងថា “បុរីវ៉ាទីកង់ ដែលដឹកនាំដោយសម្តេចប៉ាប ពួកគេបាននិយាយថា ពួកគេចាប់អារម្មណ៍ក្នុងការធ្វើជាម្ចាស់ផ្ទះការចរចាទាំងនេះ”។
ការលើកឡើងរបស់លោកត្រាំ ខាងលើនេះ បានធ្វើឡើងភ្លាមៗបន្ទាប់ពីអនុប្រធានាធិបតីសហរដ្ឋអាមេរិក លោក ចេឌី វេនស៍ (J.D. Vance) បានជួបជាមួយសម្តេចប៉ាប ឡេងូទី១៤ (Pope Leo XIV) នៅព្រឹកថ្ងៃចន្ទ ទី១៩ ខែឧសភា ឆ្នាំ២០២៥ ហើយបានផ្តល់លិខិតមួយច្បាប់ ពីលោក ត្រាំ អញ្ជើញសម្តេចប៉ាប ទៅទស្សនកិច្ចនៅសេតវិមាន។ ម៉្យាងវិញទៀត ប្រព័ន្ធផ្សព្វផ្សាយរុស្ស៊ី បានរាយការណ៍ថា លោកប្រធានាធិបតី ពូទីន បានអត្ថាធិប្បាយលើការសន្ទនាតាមទូរស័ព្ទរបស់គាត់ ជាមួយលោកត្រាំ ដោយបញ្ជាក់ថា វាជាការសន្ទនាដោយត្រង់ ដោយយុត្តិធម៌ ហើយវាមានប្រយោជន៍ខ្លាំងណាស់ក្នុងរឿងនេះ។ លោក ពូទីន បានថ្លែងអំណរគុណចំពោះលោកប្រធានាធិបតីសហរដ្ឋអាមេរិក ដែលគាំទ្រការចរចាដោយផ្ទាល់រវាងរុស្ស៊ី និងអ៊ុយក្រែន ដើម្បីធ្វើឲ្យមានកិច្ចព្រមព្រៀងសន្តិភាព។
លោកពូទីន បានថ្លែងថា “ប្រធានាធិបតីសហរដ្ឋអាមេរិក ពួកគេបានបង្ហាញជំហររបស់ខ្លួនរួចហើយ លើបទឈប់បាញ់។ ចំពោះខ្ញុំ ខ្ញុំសូមបញ្ជាក់ថា រុស្ស៊ី ក៏មានដែរ ចង់ដោះស្រាយវិបត្តិអ៊ុយក្រែន ដោយសន្តិវិធី។ យើងគ្រាន់តែត្រូវការស្វែងរកវិធីល្អបំផុត ដើម្បីឆ្ពោះទៅរកសន្តិភាព” ៕