អាហ្វហ្គានីស្ថាន៖ មន្ត្រីក្នុងស្រុកបានថ្លែងនៅថ្ងៃច័ន្ទនេះថាយ៉ាងហោចណាស់មានទាហាន៣នាក់និងសមាជិកក្រុមសកម្មប្រយុទ្ធ១១នាក់ត្រូវបានសម្លាប់ក្នុងអំឡុងពេលប៉ះទង្គិចគ្នាមួយប្រាវដ៏គួរឲ្យរន្ធត់មួយនៅជាយក្រុង Tirin Kot ទីរួមខេត្តភាគខាងត្បូង Uruzgan របស់ប្រទេសអាហ្វហ្គានីស្ថានពេញមួយរាត្រី។
អ្នកនាំពាក្យរដ្ឋាភិបាលខេត្តខាងលើលោក Doust Mohammad បានថ្លែងប្រាប់ស៊ីនហួរថាក្រុមសកម្មប្រយុទ្ធជាប្រដាប់ដោយអាវុធជាច្រើននាក់បានបើកការវាយប្រហារមកលើមូលដ្ឋានយោធាមួយកន្លែងក្នុងតំបន់ Khorma ក្រុង Tirin Kot ដែលជំរុញឲ្យមានការផ្ទុះអាវុធដាក់គ្នាបណ្តាលទាហាន៣នាក់និងក្រុមប្រដាប់អាវុធ១១នាក់ស្លាប់បាត់បង់ជីវិតកាលពីរាត្រីថ្ងៃអាទិត្យ ។
លោកបានថ្លែងថាក្រុមឧទ្ទាមដែលជាប់ពាក់ព័ន្ធនិងការវាយប្រហារនេះគឺជាក្រុមជ្រុលនិយមតាលីបង់។
ពួកខ្មាន់កាំភ្លើងទាំងនោះក៏ត្រូវបានគេជឿជាក់ថាបានគ្រប់គ្រងមូលដ្ឋាននេះអស់រយៈពេលជាច្រើនម៉ោងផងដែរមុននឹងការមកដល់របស់កងកម្លាំងជំនួយកាលពីប៉ុន្មានម៉ោងមុននឹងឈានចូលដល់ថ្ងៃច័ន្ទនេះ។
ទាហានមួយចំនួនក៏ត្រូវបានចាប់ខ្លួនដោយពួកសកម្មប្រយុទ្ធផងដែរក្នុងការវាយប្រហារនោះនេះបើតាមការឲ្យដឹងពីលោក Obaidullah Barakzai តំណាងម្នាក់មកពីសភាជាន់ទាបខេត្ត Uruzgan បានថ្លែងទីភ្នាក់ងារព័ត៌មានចិនស៊ីនហួរ។
ជាងនេះទៅទៀតកងកម្លាំងជំនួយដែលបានមកដល់កន្លែងកើតហេតុកាលពីព្រឹកថ្ងៃច័ន្ទ ។ ពួកគេកំពុងព្យាយាមដណ្តើមយកមូលដ្ឋានទ័ពនេះមកវិញហើយថែមទាំងបើកប្រតិបត្តិការស្រាវជ្រាវមួយក្នុងការស្វែងរកនិងជួយសង្គ្រោះដល់ទាហានដែលត្រូវបានគេចាប់យកទៅនោះទៀតផង ។
អំពើហិង្សាបានកើនឡើងចាប់តាំងពីការដកកម្លាំងបរទេសចេញក្នុងអំឡុងពេលពីរឆ្នាំនេះស្របពេលដែលកងកម្លាំងសន្តិសុខអាហ្វហ្គានីស្ថានពុះពារប្រឆាំងនិងការរីករាលដាលនៃការវាយប្រហារពីសំណាក់ក្រុមសកម្មប្រយុទ្ធប្រឆាំងនិងរដ្ឋាភិបាល។
គួររំលឹកថាកាលពីថ្ងៃសុក្រទាហានអាហ្វហ្គានីស្ថានម្នាក់ត្រូវបានសម្លាប់និងមនុស្ស២០នាក់ទៀតរងរបួសបន្ទាប់ពីក្រុមតាលីបង់បានបំផ្ទុះគ្រាប់បែកក្នុងរថយន្តមួយគ្រឿងនៅមូលដ្ឋានកងទ័ពមួយកន្លែងនៅខេត្ត Khost ភាគខាងកើតប្រទេស ។
ប្រែសម្រួលដោយ៖ អុីវ វិចិត្រា