កូរ៉េខាងត្បូង៖ ទីភ្នាក់ងារព័ត៌មានយ៉ុងហាប់បានរាយការណ៍ថាអតីតប្រធានាធិបីកូរ៉េខាងត្បូងលោកស្រីប៉ាក គុនហេ ត្រូវបានតុលាការសម្រេចឃុំខ្លួននាពីព្រឹកថ្ងៃសុក្រនេះពីបទស៊ីសំណូក និងរំលោភអំណាច។
តុលាការបានសម្រេចចោទប្រកាន់លោកស្រីប៉ាក ពីបទឃុបឃិតជាមួយនិងមនុស្សជំនិតម្នាក់របស់ខ្លួនដើម្បីកំហែងយកប្រាក់ពីអ្នកជំនួញធំៗ និងយកសំណូកពីក្រុមហ៊ុនមួយក្នុងចំណោមក្រុមហ៊ុនជាច្រើនហើយថែមទាំងប្រព្រឹត្តអំពើមិនសមគួរទៀតផង ។
ការចោទប្រកាន់នេះបានជំរុញឲ្យប្រជាជនកូរ៉េខាងត្បូងរាប់លាននាក់តវ៉ាតាមដងផ្លូវរៀងរាល់សប្តាហ៍អស់រយៈជាច្រើនខែមុននឹងតុលាការធម្មនុញ្ញចេញសេចក្តីសម្រេចកាលពីថ្ងៃទី១០ខែមីនាដកហូតតំណែងលោកស្រី។
គួរបញ្ជាក់ថានៅសប្តាហ៍ខាងមុខនេះ តុលាការរំពឹងថានឹងកាត់ទោសលោកស្រីប៉ាកជាផ្លូវការក្រោមបទចោទប្រកាន់កំហែងយក សូកប៉ាន់ និងរំលោភអំណាច។ គ្រាន់តែទោសសូកប៉ាន់ឬស៊ីសំណូកមួយគឺលោកស្រីនឹងគ្រប់គ្រាន់ឲ្យតុលាការផ្តន្ទាទោសជាប់ពន្ធនាគារអស់មួយជីវិតក្នុងប្រទេសកូរ៉េខាងត្បូង ។
ប្រែសម្រួលដោយ៖ អុីវ វិចិត្រា