រុស្ស៊ី៖ ទីភ្នាក់ងារព័ត៌មានរុស្ស៊ីបានស្រង់សម្តីអ្នកនាំពាក្យសេតវិមានគ្រីមលីននៅថ្ងៃសុក្រនេះថាលោកប្រធានាធិបតីវ៉្លាឌីមៀរ ពូទីន ជឿជាក់ថាការវាយប្រហារដោយមីស៊ីលរបស់សហរដ្ឋអាមេរិកមកលើមូលដ្ឋានទ័ពអាកាសស៊ីរីបានល្មើសនិងច្បាប់អន្តរជាតិហើយថែមទាំងធ្វើឲ្យអន្តរាយយ៉ាងធ្ងន់ធ្ងរដល់ទំនាក់ទំនងរវាងសហរដ្ឋអាមេរិកនិងរុស្ស៊ីទៀតផង ។
លោក Dmitry Peskov អ្នកនាំពាក្យលោកពូទីនបានលើកឡើងថាមេដឹកនាំរុស្ស៊ីស្មោះស្ម័គ្រជាមួយនិងសម្ព័ន្ធមិត្តរបស់ខ្លួនប្រធានាធិបតីស៊ីរីលោក Bashar al-Assad ពាក់ព័ន្ធនិងសកម្មភាពរបស់សហរដ្ឋអាមេរិកដែលឈ្លានពានមកលើអធិបតយ្យភាពជាតិរបស់ស៊ីរី។
សហរដ្ឋអាមេរិកបានបាញ់មីស៊ីលជិត៦០គ្រាប់ស្រោយមកលើមូលដ្ឋានទ័ពអាកាសស៊ីរីកាលពីវេលាទៀបភ្លឺថ្ងៃសុក្រនេះដោយសារតែខ្លួនចោទប្រកាន់ស៊ីរីវាយប្រហារដោយអាវុធគីមីបណ្តាលឲ្យមនុស្សស្លាប់ជាច្រើននាក់សប្តាហ៍នេះ។
ក្រុមមូស្គូរំពឹងសហការជាមួយរដ្ឋបាលថ្មីសហរដ្ឋអាមេរិកលោកប្រធានាធិបតីដូណាល់ត្រាំ រួមគ្នាប្រយុទ្ធប្រឆាំងនិងក្រុមសកម្មប្រយុទ្ធរដ្ឋអ៊ីស្លាមក្នុងប្រទេសស៊ីរីតែសកម្មភាពរបស់សហរដ្ឋអាមេរិកនាពេលនេះបានធ្វើឲ្យរុស្ស៊ីខឹងសម្បារនិងស្រឡាំងកាំង។
ជាងនេះទៅទៀតលោកពូទីនយល់ឃើញថាការវាយប្រហាររបស់សហរដ្ឋអាមេរិកមកលើស៊ីរីជាការឈ្លានពានប្រឆាំងនិងបូរណភាពទឹកដីរបស់រដ្ឋមួយដែលជាការរំលោភបំពានលើច្បាប់អន្តរជាតិ។
ប្រែសម្រួលដោយ៖ អុីវ វិចិត្រា