នាយកដ្ឋានប្រឆាំងអំពើពុករលួយម៉ាឡេស៊ី  រឹបអូសលុយ២៩លានដុល្លារ ពីលោកណាជីប

ម៉ាឡេស៊ី ៖ កាលពីថ្ងៃសុក្រ ទី២៥ ខែឧសភា ឆ្នាំ២០១៨ លោក Amar Singh ប្រធាននាយកដ្ឋានស៊ើបអង្កេតឧក្រិដ្ឋកម្មពាណិជ្ជកម្ម បានប្រាប់ទីភ្នាក់ងារព័ត៌មានរ៉យទ័រ ថា លុយដែលរឹបអូសបានពីខុនដូកូនប្រុសអតីតនាយករដ្ឋមន្ត្រី លោកណាជីប រ៉ាហ្សាក់ នោះ ទាំង៣៥ប្រអប់ មានលុយសរុប២៩លានដុល្លារឯណោះ។ ចំណែកនាឡិកា និងគ្រឿងអលង្ការជាច្រើនផ្សេងទៀតនោះ គេមិនទាន់កំណត់តម្លៃសរុបបាននៅឡើយទេ។

លោក Amar Singh បានឱ្យដឹងទៀតថា លុយដែលរឹបអូសបាននោះ គឺជាប្រភេទរូបិយប័ណ្ណមានមកពីប្រទេស២៦ផ្សេងគ្នា។  វាត្រូវបានគេរាប់ចាប់ពីថ្ងៃ២១ ដល់​ថ្ងៃ២៣ ទើបអស់ ដោយប្រើប្រាស់បុគ្គលិកធនាគារ២២នាក់ និងប្រើម៉ាស៊ីនរាប់១២គ្រឿងផង។

តាមពិតទៅ លុយនិងគ្រឿងអលង្ការទាំងអស់នោះ ត្រូវបានរឹបអូសពីខុនដូ ចំនួនបីផ្សេងគ្នា ដោយខុនដូ២ ជារបស់កូនប្រុស និងកូនស្រីរបស់លោកណាជីប រ៉ាហ្សាក់ ដែលជាអ      តីតនាយករដ្ឋមន្ត្រី និងជាប់ពាក់ព័ន្ធអំពើពុករលួយ ក្នុងមូលនិធិ 1MDB នោះ។ ចំណែកខុនដូទី៣នោះ មិនមានមនុស្សរស់នៅឡើយ។

សូមបញ្ជាក់ថា កាលពីថ្ងៃសុក្រ សប្តាហ៍មុន ប៉ូលិសរឹបអូសបានវត្ថុតាងជាច្រើន ក្នុងប្រតិបត្តិការឆែកឆេរស្វែងរកឯកសារពាក់ព័ន្ធសំណុំរឿងពុករលួយ 1MDB។ ក្រៅពីកាបូបចំនួន៧២ ដែលមានដាក់លុយ និងគ្រឿងអលង្ការពេញនោះ ប៉ូលិសក៏រឹបអូសបានកាបូបយួរថ្លៃៗ ចំនួន២៨៤ផ្សេងទៀត មានខ្លះជាម៉ាកល្បីៗ ដូចជា Hermes និង Louis Vuitton៕