នាយករដ្ឋមន្ត្រីម៉ាឡេស៊ីថ្មី ចង់បានបក្សប្រឆាំង ធ្វើកញ្ចក់ឆ្លុះរដ្ឋាភិបាល

កាលពីថ្ងៃទីសុក្រ ទី២៨ ខែមិថុនា ឆ្នាំ ២០១៨ លោកមហាធៀ មហាម៉ាត់ នាយករដ្ឋមន្ត្រីម៉ាឡេស៊ី ដែលទើបជាប់ឆ្នោតថ្មី បាននិយាយថា លោកចង់បានបក្សប្រឆាំងថ្មីខ្លាំង អាចធ្វើជាកញ្ចក់ឆ្លុះបញ្ចាំងសកម្មភាពរដ្ឋាភិបាលបាន។

លោកបានបន្តថា ឥឡូវនេះមិនមានបក្សប្រឆាំងដែលល្អ និងខ្លាំងដែលអាចធ្វើជាកញ្ចក់ឆ្លុះសម្រាប់រដ្ឋាភិបាលឡើយទេ។ លោកមើលឃើញ អតីតបក្សកាន់អំណាច UMNO នៅទន់ខ្សោយ ព្រោះសមាជិកបក្សនេះបន្តបែកបាក់គ្នាចាប់ពីពេលចាញ់ឆ្នោតខែមុន។

សម្ព័ន្ធបក្សប្រឆាំងដ៏ធំ UMNO ដែលជាផ្នែកមួយនៃសម្ព័ន្ធ Barisan Nasional ធ្លាប់ដឹកនាំប្រទេសម៉ាឡេស៊ី រាប់ទសវត្សរ៍ និងទើបចាញ់ឆ្នោតកាលពីខែឧសភា កន្លងមកនេះនៅ មិនទាន់រើសបានមេដឹកនាំថ្មីឡើយ។ នេះជាមូលហេតុធ្វើឱ្យលោកមហាធៀ នាយករដ្ឋមន្ត្រីទី៧ យល់ថា បក្សប្រឆាំងនេះមិនទាន់រឹងមាំ និងស័ក្តិសមជាគូប្រជែងដ៏ល្អក្នុងសង្គមប្រជាធិបតេយ្យឡើយ។

លោកមហាធៀ សង្កត់ធ្ងន់បែបនេះ “យើងចង់បានបក្សប្រឆាំង ព្រោះយើងចាត់ទុកបក្សប្រឆាំង ដូចជាកញ្ចក់ឆ្លុះ។ យើងនឹងមើលឃើញថា មុខរបស់យើងមានស្លាកស្នាម ឬមានបញ្ហាអត់។ ប៉ុន្តែក្នុងករណីដែលយើងមិនមានបក្សប្រឆាំង ដែលធ្វើជាកញ្ចក់ឆ្លុះនេះទេ យើងនឹងគិតថា ខ្លួនយើងស្រស់ស្អាត ប៉ុន្តែតាមពិតយើងមានច្រមុះវៀចសោះ”៕