ភ្នំពេញ៖ ស្រាបៀរ Hoegaarden និង Leffe ជាច្រើនដប ត្រូវបានកម្លាំងនគរបាលប្រឆាំងបទល្មើសសេដ្ឋកិច្ច ចុះចាប់ និងរឹបអូសស្រាបៀរទាំងពីរប្រភេទនេះ ក្រោយទទួលបណ្តឹងរបស់ក្រុមហ៊ុន Auskhmer Import Export Co., Ltd. ដែល ជាក្រុមហ៊ុនទទួលបានសិទ្ធិចែកចាយ ស្រាបៀរទាំងពីរប្រភេទនេះ នៅក្នុងប្រទេសកម្ពុជា ។
ហេតុការណ៍ចុះទៅចាប់ និងរឹបអូសខាងលើនេះ បានធ្វើឡើងកាលពីព្រឹកថ្ងៃទី០៧ ខែកក្កដា ឆ្នាំ២០១៦នេះ នៅហាងលក់ភេសជ្ជៈ «៧ GOURMET» មានម្ចាស់ ជាជនជាតិបារាំង ស្ថិតតាមបណ្តោយផ្លូវប៉ាស្ទើរ ក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ ។
សមត្ថកិច្ចបានបញ្ជាក់ថា ក្រោយប្រតិបត្ដិការចុះឆែឆេរខាងលើនេះ សមត្ថកិច្ចបានរកឃើញ ស្រាបៀរ Hoegaarden បានចំនួន ៩០ដប និងស្រាបៀរ Leffe បានចំនួន ២៥៨ដប ដែលហហាងនេះ បានតាំងលក់ ដោយពុំមានច្បាប់អនុញ្ញាត ។
ប្រភពពីសមត្ថកិច្ចបានឲ្យដឹងទៀតថា បន្ទាប់ពីចុះចាប់នៅហាង «៧ GOURMET» កម្លាំងសមត្ថកិច្ច រួមជាមួយម្ចាស់ក្រុមហ៊ុន បានបន្តដំណើរចុះទៅឆែកឆេរនៅ ទីតាំងក្រុមហ៊ុនមួយកន្លែងទៀតស្ថិតនៅក្បែរសណ្ឋាគារអ៉ីនធើខន ក្នុងខណ្ឌចំការមន ៕
