ភ្នំពេញ ៖ បុរសម្នាក់ជាមន្ត្រីនគរបាលខណ្ឌឬស្សីកែវ ផ្នែកសន្តិសុខ ដោយសារតែតូចចិត្តប្រពន្ធលែង រយៈពេល១ឆ្នាំមកហើយ បានសម្រេចចិត្តយកខ្សែកាបចងកខ្លួនឯងស្លាប់ បង្កឲ្យមានការភ្ញាក់ផ្អើលដល់សមត្ថកិច្ចមូលដ្ឋានចុះមកធ្វើកោសល្យវិច័យ ហេតុការណ៍នេះបានកើតឡើងកាលពីវេលាម៉ោង៥ល្ងាច ថ្ងៃទី០៤ ខែមករា ឆ្នាំ២០១៨ តាមបណ្តោយផ្លូវលំនៅចំណុចផ្ទះលេខ2026 ក្រុម១ ភូមិបឹងឈូក សង្កាត់គីឡូម៉ែតលេខ៦ ខណ្ឌឬស្សីកែវ ។
ជនរងគ្រោះដែលស្លាប់មានឈ្មោះតូច សារ៉ាត់ ភេទប្រុស អាយុ៤៥ឆ្នាំ មុខរបរជាមន្ត្រីនគរបាលខណ្ឌឬស្សីកែវ ស្នាក់នៅផ្ទះលេខ2026 ផ្លូវលំ ក្រុម១ ភូមិបឹងឈូក សង្កាត់គីឡូម៉ែតលេខ៦ ខណ្ឌឬស្សីកែវ មានស្រុកកំណើតនៅភូមិប្រសូត ស្រុកស្វាយទាប ខេត្តស្វាយរៀង។
តាមប្រភពពត៌មានពីសមត្ថកិច្ចបានឲ្យដឹងថា មុនពេលកើតហេតុវេលាម៉ោង៥ល្ងាច មានបងប្អូនជនរងគ្រោះបានទូរស័ព្ទរាយការណ៍ប្រាប់ថា ប្អូនប្រុសរបស់គាត់ដែលធ្វើប៉ូលិសនៅខណ្ឌឬស្សីកែវ បានចងកសម្លាប់ខ្លួន ដោយមិនដឹងថា ចងតាំងពីម៉ោងប៉ុន្មាននោះទេ គឺចងនៅលើដំបូលផ្ទះ ទើបកម្លាំងប៉ុស្តិ៍នគរបាលគីឡូ៦ ចុះទៅមើលកន្លែងកើតហេតុ ដើម្បីឲ្យធ្វើកោសល្យវិច័យ ។
បើតាមប្រភពពត៌មានពីបងស្រីរបស់ជនរងគ្រោះ បានឲ្យដឹងថា ជនរងគ្រោះខាងលើមានវិបត្តិរឿងលែងលះជាមួយប្រពន្ធរយៈពេល១ឆ្នាំមកហើយ ទើបសម្រេចចិត្តយកខ្សែកាបមកចងកសម្លាប់ខ្លួនបែបនេះ ។
ក្រោយពេលកើតហេតុ សពរបស់ជនរងគ្រោះត្រូវបានសាច់ញាតិធ្វើបុណ្យនៅឯផ្ទះកើតហេតុខាងលើទៅតាមប្រពៃណី៕