រូបភាព៣សន្លឹកដែលបង្ហាញពីសកម្មភាពមន្ត្រីប៉ូលិសចរាចរណ៍ម្នាក់ បានជួយបណ្តើរកង់បុរសចំណាស់ម្នាក់ដែលបានដឹកឈើពេញលើរានខាងក្រោយ ឆ្លងស្ពានគីហ្សូណា ធ្វើឲ្យមហាជនជាច្រើនភ្ញាក់ផ្អើលនិងសរសើរពេញៗមាត់។
មន្ត្រីប៉ូលិសចរារណ៍រូបនេះមិនត្រូវបានស្គាល់អត្តសញ្ញាណនោះទេ គ្រាន់តែដឹងថា មានឋានន្តរស័ក្តិ១។
យោងតាមទំព័រហ្វេសប៊ុកឈ្មោះកំពង់ចាមកំពង់ចិត្ត បានបង្ហោះសារថា “គាំទ្រសកម្មភាពនគរបាលចរាចរណ៍គោលដៅគល់ស្ពានគីហ្សូណា ខេត្តកំពង់ចាម បានជួយលោកតាជិះកង់ម្នាក់បណ្តើរឡើងស្ពានគីហ្សូណា នេះជាមន្ត្រីប៉ូលិសបម្រើប្រជាពលរដ្ឋ។
សកម្មភាពដ៏ល្អនេះ បានទាក់ទាញទឹកចិត្តមហាជនឲ្យមានការកោតសរសើរ ដោយមានអ្នកខ្លះថា បើមានមន្ត្រីល្អបែបនេះច្រើន ប្រជាពលរដ្ឋនឹងសប្បាយចិត្តហើយតែងតែគោរពស្រលាញ់ជានិច្ច។ ចំណែកអ្នកខ្លះទៀតថា មន្ត្រីប៉ូលិសចរាចរណ៍ដែលតែងតែចាំជំរិតយកលុយពីប្រជាពលរដ្ឋ គួរណាតែចេះខ្មាសលោកពូប៉ូលិសម្នាក់នេះ៕