ភ្នំពេញ ៖ នារីរូបស្រស់ម្នាក់ ខណៈដែលកំពុងគេងលក់សុខៗ ស្រាប់តែឮសំឡេងខ្យល់បក់វូរៗប៉ះស័ង្កសី ឮសូរក្រោកក្រាក ទាំងកណ្តាលយប់ ធ្វើឲ្យនាងមានអារម្មណ៍ភ័យខ្លាច ក៏បានខលហៅសមត្ថកិច្ចចុះទៅពិនិត្យព្រោងព្រាត។
ហេតុការន័នេះបានកើតឡើងកាលពីវេលាម៉ោង៣ទៀបភ្លឺ ថ្ងៃទី២ ខែកក្កដា ឆ្នាំ២០២០ នៅបុរីពិភពថ្មីចំការដូង ផ្លូវអក្សរ E ផ្ទះលេខ៤៨ ស្ថិតក្នុងសង្កាត់ព្រៃស ខណ្ឌដង្កោ។
នារីរូបស្រស់ជាម្ចាស់ផ្ទះ មិនត្រូវបានស្គាល់អត្តសញ្ញាណនោះទេ តាមការពិនិត្យមានវ័យប្រហែលជាង២០ឆ្នាំ មុខរបរលក់ឡេ និងគ្រឿងសំអាង រស់នៅផ្ទះលេខ៤៨ ផ្លូវអក្សរ E នៅបុរីពិភពថ្មីចំការដូង ស្ថិតក្នុងសង្កាត់ព្រៃស ខណ្ឌដង្កោ។
ប្រភពពីនារីវ័យក្មេងជាម្ចាស់ផ្ទះ សុំមិនបញ្ចេញឈ្មោះ បានឲ្យដឹងថា កាលពីក្បាលព្រលប់ នាងបានចូលគេងដូចធម្មតា លុះដល់ម៉ោងជិត៣ទៀបភ្លឺ ឈានចូលថ្ងៃទី២ ខែកក្កដា ឆ្នាំ២០២០នេះ ខណៈកំពុងគេងលក់ស្កប់ស្កល់ នាងបានឮសូរសំឡេង ដូចជាមានអ្នកគាស់ផ្ទះចូលលួចទ្រព្យសម្បត្តិរបស់នាង ពេលនោះ ដោយសារតែនាងជាមនុស្សស្រី ហើយនៅផ្ទះតែម្នាក់ឯង ក៏មានអារម្មណ៍ ភ័យខ្លាច ទើបលើកទូរស័ព្ទប្តឹងសមត្ថកិច្ចថា មានចោរចូលផ្ទះតែម្ដងទៅ។
បន្ទាប់ពីទទួលបានដំណឹងភ្លាម សមត្ថកិច្ចមូលដ្ឋាន ក៏ដូចជា សន្តិសុខដែលយាមនៅបុរីខាងលើ បាននាំគ្នាប្រញា់ប្រញាល់ចុះទៅដល់ផ្ទះនារីរូបស្រស់នោះ ហើយក៏បានដើរមើលជុំវិញផ្ទះ និងក្នុងផ្ទះ ប៉ុន្តែមិនឃើញមានអ្វីប្លែកនោះទេ មានតែឮសំឡេងខ្យល់បក់ប៉ះជាមួយនឹងស័ង្កសីនៅលើដំបូលផ្ទះ ឮសូតក្រោកក្រាកតែប៉ុណ្ណោះ ។
ក្រោយពេលកើតហេតុ សមត្ថកិច្ចបានបញ្ជាក់ដែរថា មកពីនារីជាម្ចាស់ផ្ទះនៅតែម្នាក់ឯង ហើយណាមួយក៏មានខ្យល់បក់ប៉ះជាមួយនឹងសង្ក័សីលើដំបូលផ្ទះទៀត ទើបធ្វើឱ្យនាងភ័យខ្លាច ក៏កើតមានអារម្មណ៍គិតស្រមៃថា ជនសង្ស័យចូលគាស់ផ្ទះតែម្ដងទៅ ៕