ខេត្តបាត់ដំបង ៖ ទូរថភ្លើង ចំនួន៣ទូ បានធ្លាក់ចេញពីផ្លូវដែក ក្រឡាប់ចាក់ស្រូវចោល បង្កឱ្យមានការភ្ញាក់ផ្អើល ប៉ុន្តែជាសំណាងល្អ ពុំមានប៉ះពាល់ដល់អាយុជីវិតនរណាម្នាក់ឡើយ។
ហេតុការណ៍នេះ បានកើតឡើង កាលពីវេលាម៉ោង៤រសៀល ថ្ងៃទី៣១ ខែមីនា ឆ្នាំ២០២៥ នៅចំណុចភូមិអូរតាគី ឃុំអូរតាគី ស្រុកថ្មគោល។
យោងតាមប្រភពប្រជាពលរដ្ឋរស់នៅក្បែរចំណុចកើតហេតុ បានបញ្ជាក់ឱ្យដឹងថា មុនពេលកើតហេតុ គេឃើញមានរថភ្លើង ១ខ្សែ បើកបរក្នុងទិសដៅពីបាត់ដំបង ទៅខេត្តបន្ទាយមានជ័យ លុះទៅដល់ចំណុចកើតហេតុ មានទូ ចំនួន៣ បានធ្លាក់ចេញពីផ្លូវដែក ក្រឡាប់ចាក់ស្រូវចោលតែម្តង តែសំណាងល្អ នៅក្បែរផ្លូវ ពុំមានមនុស្ស ទើបពុំបានបង្កឱ្យមានគ្រោះថ្នាក់ដល់នណាម្នាក់ឡើយ។
ក្រោយពេលកើតហេតុ កម្លាំងជំនាញពាក់ព័ន្ធ និងកម្លាំងគ្រឿងចក្រ នៃអង្គភាពរាជាយស្ម័យយានបាត់ដំបង បានចេញប្រតិបត្តិការធ្វើការជួសជុលផ្លូវមួយខ្សែ ត្រង់ចំណុចកើតហេតុ ដោយធ្វើការផ្លាស់ប្តូរដែករ៉ៃ និងធ្វើការស្ទូចទូរថភ្លើងដែលក្រឡាប់ទាំងនោះ ឡើងមកលើផ្លូវដែលវិញ។
យ៉ាងណា ករណីខាងលើនេះ នៅមិនទាន់មានប្រភពណាមួយអះអាងអំពីមូលហេតុនៅឡើយ៕