ខេត្តស្វាយរៀង ៖ មុខសញ្ញាក្មេងទំនើង ចំនួន២នាក់ ត្រូវបានសមត្ថកិច្ចឃាត់នាំយកមកសាកសួរ និងធ្វើការអប់រំណែនាំ កោរសក់ ជាការព្រមាន មុននឹងកោះហៅឪពុកម្តាយ មកធានាយកត្រឡប់ទៅផ្ទះវិញ។
ការបង្ក្រាបមុខសញ្ញាក្មេងទំនើងទាំង២នាក់ បានធ្វើឡើង កាលពីវេលាម៉ោង ១១និង៣០នាទីយប់ ថ្ងៃទី៣១ ខែមីនា ឆ្នាំ២០២៥ នៅត្រង់ចំណុចខាងជើងខ្លោងទ្វារវត្តបឹងរ៉ៃ ស្ថិតភូមិព្រៃខ្លា ឃុំក្រោលគោ ស្រុកស្វាយជ្រំ។
មុខសញ្ញាក្មេងទំនើង ទាំង២នាក់ ដែលត្រូវសមត្ថកិច្ចឃាត់ខ្លួន ទី១-ឈ្មោះ ផ.ម ភេទប្រុស អាយុ១៧ឆ្នាំ មុខរបរកសិករ មានលំនៅ ភូមិត្បែង ឃុំព្រៃឈ ស្រុកកំពង់ត្របែក ខេត្តព្រៃវែង និងទី២-ឈ្មោះ ឈ.ស.ភ ភេទប្រុស អាយុ២០ឆ្នាំ មុខរបរកសិករ មានលំនៅ ភូមិត្បែង ឃុំព្រៃឈ ស្រុកកំពង់ត្របែក ខេត្តព្រៃវែង។
តាមប្រភពសមត្ថកិច្ច បានឱ្យដឹងថា កាលពីវេលាម៉ោង ១១និង៣០នាទីយប់ ថ្ងៃទី៣១ ខែមេសា ឆ្នាំ២០២៥ កម្លាំងប៉ុស្តិ៍នគរបាលរដ្ឋបាលក្រោលគោ បានធ្វើការល្បាតចល័តតាមភូមិសាស្ត្រក្នុងមូលដ្ឋាន បានប្រទះឃើញនិងឃាត់ខ្លួនមុខសញ្ញាក្មេងទំនើង ចំនួន២នាក់ នៅត្រង់ ចំណុចខាងជើងខ្លោងទ្វារវត្តបឹងរ៉ៃ ស្ថិតភូមិព្រៃខ្លា ឃុំក្រោលគោ ស្រុកស្វាយជ្រំ។
ប្រភពដដែល បន្តថា បន្ទាប់មក កម្លាំងជំនាញនៃអធិការដ្ឋានគរបាលស្រុកស្វាយជ្រំ សហការជាមួយកម្លាំងប៉ុស្តិ៍នគរបាលរដ្ឋបាលក្រោលគោ បានធ្វើនាំខ្លួនមុខសញ្ញាក្មេងទំនើង ទាំង២នាក់ មកកាន់អធិការដ្ឋាននគរ បាលស្រុកស្វាយជ្រំ ដើម្បីអប់រំ ណែនាំ ធ្វើកិច្ចសន្យា និងធ្វើតេស្តរកសារធាតុញៀន (ជាលទ្ធផលអវិជ្ជមាន)។បន្ទាប់ពីធ្វើការអប់រំណែនាំ កោរសក់រួច សមត្ថកិច្ចបានអញ្ជើញអាណាព្យាបាលក្មេងទំនើងទាំង២នាក់ មកធ្វើលិខិតធានាយកទៅអប់រំនៅផ្ទះបន្ត៕
