ខេត្តរតនគិរី ៖ គោយន្តកែច្នៃ ១គ្រឿង បានដឹករថយន្តតូយ៉ូតា ព្រូស ១គ្រឿង ដែលខូច ធ្វើដំណើរតាមផ្លូវ រួចជ្រុលទៅបុករះស្លាកគណបក្សប្រជាជនកម្ពុជា បណ្តាលឱ្យបាក់ខ្ទេច។
ហេតុការណ៍នេះ បានកើតឡើងកាលពីវេលាម៉ោង ៦និង៣០នាទីព្រលប់ ថ្ងៃទី៣១ ខែមីនា ឆ្នាំ២០២៥ នៅតាមបណ្តោយផ្លូវជាតិលេខ៧៨ ត្រង់ចំណុចផ្លូវកែងសាលាបឋមសិក្សាយក្ខឡោម ស្ថិតក្នុងភូមិឡាប៉ូ សង្កាត់យក្ខឡោម ក្រុងបានលុង។
តាមប្រភពអ្នកធ្វើដំណើរតាមដងផ្លូវ បានឱ្យដឹងថា មុនពេលកើតហេតុ គេបានឃើញគោយន្តកែច្នៃ ១គ្រឿង ដឹករថយន្ត ១គ្រឿង ម៉ាកតូយ៉ូតា ព្រូស ពណ៌ត្រេអ៊ី ដែលគេដឹងថា ជារថយន្តរបស់មន្ត្រីភូមិបាលស្រុកអណ្តូងមាសម្នាក់ ដែលបានខូច បើកទៅមុខមិនរួច ទើបហៅគោយន្តខាងលើ មកដឹក។
ប្រភពដដែល បន្តថា ពេលនោះ គេឃើញគោយន្តខាងលើ បានបើកបោះពួយយ៉ាងលឿនក្នុងទិសដៅពីកើត មកលិច ដោយល្បឿនយ៉ាងលឿន និងបានរេចង្កូតពេញផ្លូវ (ផ្លូវមួយ បើកតែឯង) សង្ស័យតៃកុងស្រវឹងស្រាស្រាប់តែមកដល់ចំណុចកើតហេតុខាងលើ ក្បែររង្វង់មូលចូលទៅរមណីយដ្ឋានធម្មជាតិ បឹងយក្ខឡោម ជ្រុលទៅបុកដើមពុទ្រា ១ដើម និងស្លាកគណបក្ស ប្រជាជនកម្ពុជា ខូចខាតខ្ទេច សំណាងពុំបានបង្កគ្រោះថ្នាក់ដល់ជីវិតមនុស្សនោះទេ។
តាមសម្តីតៃកុងគោយន្ត បានឱ្យដឹងថា គាត់បើកប្រកាន់ស្តាំរហូត ពីកើត មកលិច លុះមកដល់ចំណុចកើតហេតុ ដោយសារឃើញមនុស្សច្រើននៅក្បែររង្វង់មូលនោះ ទើបរេចង្កូតមកឆ្វេង ក្បែរសាលារៀន បណ្តាលឲ្យជ្រុលទៅបុកដើមពុទ្រា និងស្លាកគណបក្សតែម្តង។
ក្រោយពេលកើតហេតុ ដោយសារគ្រោះថ្នាក់ខាងលើ មិនបង្កឱ្យប៉ះពាល់ដល់អាយុជីវិតមនុស្ស ទើបសមត្ថកិច្ចអនុញ្ញាតឱ្យម្ចាស់គោយន្ត និងម្ចាស់ឡាន សម្របសម្រួលធ្វើការជួសជុលស្លាកគណបក្សវិញ៕