ភ្នំពេញ ៖ កម្លាំងសមត្ថកិច្ចការិយាល័យនគរបាលព្រហ្ម ទណ្ឌកម្រិតស្រាលរាជធានីភ្នំពេញ កាលពីរសៀលថ្ងៃទី០១ ខែ មេសា ឆ្នាំ២០២៥ បានឃាត់ខ្លួនអាជីវករម្មាក់ នៅចំណុចស្ថានីយប្រេងឥន្ធនៈ ភីធីធី ផ្លូវលេខ៤៣០ សង្កាត់ទួលទំពូង២ ខណ្ឌចម្ការមន ពាក់ព័ន្ធករណីចេញសែកស្អុយ ប្រមាណជាង ១០ម៉ឺនដុល្លារ។
តាមប្រភពសមត្ថកិច្ច បានឱ្យដឹងថា ការចាប់និងបញ្ជូនខ្លួនអាជីវករនេះ សមត្ថកិច្ចបានអនុត្តទៅតាមដីកាបង្គាប់ឱ្យចាប់ខ្លួន របស់ចៅក្រមស៊ើបសួរសាលាដំបូងរាជធានីភ្នំពេញ ។
តាមដីកាបង្គាប់ឱ្យចាប់ខ្លួន បានបញ្ជាក់ថា ក្រោយពីបានពិនិត្យលើសំណុំរឿងចប់សព្វគ្រប់ យល់ឃើញថា ជនត្រូវចោទឈ្មោះ ម៉េង តារា ភេទប្រុស អាយុ៣១ឆ្នាំ មានលំនៅ ផ្ទះលេខ 21B ផ្លូវលេខ៤១០ ភូមិស្ទឹងជ្រៅ សថ្កាត់ដើមមៀន ក្រុងតាខ្មៅ ខេត្តកណ្តាល ត្រូវបានដាក់ឱ្យស្ថិតនៅក្រោមការពិនិត្យ ពីបទមិនបំពេញកាតព្វកិច្ចចំពោះឧបករណ៍អាចជួញដូរបាន ប្រព្រឹត្តនៅចំណុចរាជធានីភ្នំពេញ កាលពីថ្ងៃទី០១ ខែវិច្ឆិកា ឆ្នាំ២០២៤ បទ ល្មើសដែលមានចែងឱ្យផ្តន្ទាទោសតាមបញ្ញត្តិមាត្រា២៣១ នៃច្បាប់ស្តីពីឧបរណ៍អាចជួញដូរបាន និងប្រត្តិបត្តិការទូទាត់ប្រាក់។
តាមប្រភពព័ត៌មាន បានបង្ហើបឱ្យដឹងថា ជនសង្ស័យបានខ្ចីប្រាក់អ្នកដទៃ ប្រមាណជាង១០ម៉ឺនដុល្លារ ដើម្បីយកទៅធ្វើដើមទុករកស៊ី ដោយបានដាក់តម្កល់មូលប្បទានបត្រនៅធនាគារ ដើម្បីធានានូវការទូទាត់សងប្រាក់ឱ្យដើមបណ្តឹងវិញ។ លុះដល់ថ្ងៃកំណត់ ដើមបណ្តឹងបានយកសែកនោះទៅដកប្រាក់ ពីធនាគារ បែរជាគ្មានសាច់ប្រាក់ (សែកស្អូយ) ទើបម្ចាស់បំណុលប្តឹងឱ្យសមត្ថកិច្ចឱ្យចាត់ការតាមផ្លូវច្បាប់តែម្តង។
ក្រោយចាប់ខ្លួនជនសង្ស័យ សមត្ថកិច្ចបានរៀបចំកសាងសំណុំរឿង ប្រគល់ជូនចៅក្រមស៊ើបសួរសាលាដំបូងរាជធានីភ្នំពេញ នៅរសៀលថ្ងៃទី០២ ខែមេសា ឆ្នាំ២០២៥ ដើម្បីបន្តនីតិវិធី៕