ភ្នំពេញ ៖ មន្ត្រីនគរបាលចរាចរណ៍ម្នាក់ ដែលបែកធ្លាយវីដេអូហុចដៃយកលុយពីរថយន្តធុនធំ ដឹកអុស ១គ្រឿង នៅគោលដៅស្តុបស្ពានអាកាសផ្សារដីហុយ បើកផ្លូវឲ្យរថយន្តធំចេញចូលក្នុងរាជធានី បានដោយសេរី ទាំងក្នុងពេលម៉ោងហាមឃាត់នោះ ត្រូវបានលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរ បាលរាជធានីភ្នំពេញ បញ្ជាឱ្យនាយការិយាល័យនគរបាលចរាចរណ៍ផ្លូវគោក ស្រាវជ្រាវអញ្ជើញមន្ត្រីនោះ មកសាកសួរនាំនៅការិយាល័យនគរបាលចរាចរណ៍ផ្លូវគោក កាលពីថ្ងៃទី៣ ខែមេសា ឆ្នា២០២៥។
មន្ត្រីនគរបាលចរាចរណ៍ ដែលយកលុយពីឡានធំ បណ្តោយឲ្យចេញចូលក្នុងរាជធានីក្នុងេពេលម៉ោងហាម ឃាត់នោះ មាន ឈ្មោះ សាន វិចិត្រ ឋានន្តរស័ក្តិ អនុសេនីយ៍ឯក ប្រចាំការនៅគោលដៅស្តុបស្ពានអាកាសដីហុយ។
ការកោះហៅមន្ត្រីនគរបាលចរាចណ៍ខាងលើ មកសាកសួរ បន្ទាប់ពីមានការផ្សព្វផ្សាយព័ត៌មាន និងវីដេអូ តាមបណ្តាញសង្គម បង្ហាញនូវសកម្មភាពមន្ត្រីនគរបាលចរាចរណ៍រូបនេះ បានហុចដៃយកលុយពីអ្នកដឹកអុសតាមរថយន្តធុនធំ នៅគោលដៅស្តុបស្ពានអាកាសផ្សារដីហុយ ហើយបណ្តោយឲ្យរថយន្តធុនធំដឹកអុសនោះ ធ្វើចរាចរណ៍ចូលក្នុងរាជធានីភ្នំពេញ ក្នុងពេលវេលាហាមឃាត់ ដោយមិនបានឃាត់ត្រួតពិនិត្យអ្វីឡើយ ដែលធ្វើឲ្យមហាជន បញ្ចេញប្រតិកម្មរិះគន់ព្រោងព្រាត ពេញបណ្តាញសង្គម និងធ្វើឲ្យប៉ះពាល់ដល់កិត្តិយស សេចក្តីថ្លៃថ្នូររបស់អង្គភាពនគរបាលជាតិ។
លោកអនុសេនីយ៍ឯក សាន វិចិត្រ មន្ត្រីនគរបាលចរាចរណ៍គោលដៅស្តុបស្ពានអាកាសដីហុយខាងលើនេះ ត្រូវបានមន្ត្រីជំនាញនៃការិយាល័យនគរបាលចរាចរណ៍ផ្លូវគោក ធ្វើការសាកសួរ និងសុំគោលការណ៍ពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ពិនិត្យសម្រេច។ ប្រសិនត្រូវបានរកឃើញមានកំហុសបំពេញភារកិច្ចមិនគោរពច្បាប់ និងមិនគោរពវិន័យនគរបាលជាតិ នឹងប្រឈមការសម្រេចអនុវត្តវិន័យកងកម្លាំងនគរបាលជាតិ៕