ភ្នំពេញ ៖ រថយន្តទំនើប ១គ្រឿង បានធ្វើដំណើរទៅឆេងម៉េង ជាលក្ខណៈគ្រួសារ តែមិនទាន់ដល់គោលដៅផង ក៏ជួបហេតុការណ៍គ្រោះថ្នាក់ចរាចរណ៍ បង្កដោយរថយន្តកូរ៉េដឹកឈើ ១គ្រឿង បើកបុកសួនទ្រូងផ្លូវ រួចហោះមកបុករថយន្តទំនើប ពេញទំហឹង បណ្តាលឱ្យខូចខាតយ៉ាងធ្ងន់ តែសំណាងល្អ មិនបង្កឱ្យមនុស្សណាម្នាក់រងរបួស ឡើយ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៤ទៀបភ្លឺ ថ្ងៃទី០៤ ខែមេសា ឆ្នាំ២០២៥ នៅលើកំណាត់ផ្លូវជាតិលេខ៦ សង្កាត់ព្រែកលៀប ខណ្ឌជ្រោយចង្វា។
តាមសម្តីម្ចាស់រថយន្តទំនើប បានឱ្យដឹងថា មុនពេលកើតហេតុ គាត់និងក្រុមគ្រួសារ បាននាំគ្នាធ្វើដំណើរតាមរថយន្ត ១គ្រឿង ម៉ាក LEXUS LX-570 ពណ៌ខ្មៅ ពាក់ស្លាកលេខ ភ្នំពេញ 2N-1899 បើកបរតាមបណ្តោយផ្លូវជាតិលេខ៦ ក្នុងទិសដៅពីត្បូង ទៅជើង។ លុះពេលធ្វើដំណើរ មកដល់ត្រង់ចំណុចកើតហេតុ គាត់បានឃើញ រថយន្តកូរ៉េ ដឹកដឹកឈើ ១គ្រឿង ម៉ាក HYUNDAI ពណ៌ខៀវ ពាក់ស្លាកលេខ ភ្នំពេញ 2O-7405 ដែលកំពុងរេចង្កូត នៅលើកំណាត់ផ្លូវជាតិលេខ៦ ក្នុងទិសដៅបញ្ច្រាសគ្នា ហើយរថយន្តកូរ៉េនោះ បានបុកឡើងខឿនសួនច្បារពុះចែកទ្រូងផ្លូវ ពីម្ខាង ធ្លាយទៅម្ខាងទៀត បណ្តាលឱ្យបុករថយន្តរបស់គាត់ យ៉ាងពេញទំហឹងតែម្តង។ ចំណែករថយន្តកូរ៉េនោះ នៅមិនទាន់អស់ល្បឿន ជ្រុលទៅបុកធ្លាយរបងឃ្លាំងមួយកន្លែងថែមទៀត។
ម្ចាស់រថយន្ត Lexus បានបន្ថែមថា ភ្លាមៗនោះ គាត់បានព្យាយាមបួងចង្កូតគេចចេញដែរ ប៉ុន្តែគេចមិនផុត ត្រូវរថយន្តកូរ៉េបុកយ៉ាងពេញទំហឹង បណ្តាលឱ្យរថយន្តរបស់គាត់ខូចខាតមួយកំណាត់មុខទាំងស្រុង ព្រមទាំងរលត់ម៉ាស៊ីន មិនអាចបន្តដំណើរទៅមុខទៀតបាន តែសំណាងល្អ នៅក្នុងហេតុការណ៍នេះ មិនបណ្តាលឱ្យសមា ជិកក្រុមគ្រួសារគាត់ណាម្នាក់ រងគ្រោះថ្នាក់ធ្ងន់នោះទេ គ្រាន់តែភ័យព្រលឹងចុងសក់គ្រប់ៗគ្នា។
ក្រោយកើតហេតុ សមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង យករថយន្តបង្កហេតុ និងរថយន្តរងគ្រោះ ទៅរក្សាទុកនៅការិយាល័យចរាចរណ៍ផ្លូវគោក នៃស្នង ការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនមកដោះស្រាយតាមនីតិវិធី៕
