បង្ហូរទឹកស្អុយចូលទន្លេ រដ្ឋមន្ត្រីបញ្ជាចុះពិនិត្យ

ភ្នំពេញ ៖ ក្រោយមានការបង្ហោះចែកចាយរូបភាពវីដេអូបង្ហាញពីទឹកកខ្វក់ ហូរចូលទន្លេមេគង្គ កាលពីថ្ងៃទី២ ខែមេសា ឆ្នាំ២០២៥ ធ្វើឱ្យមានការចាប់អារម្មណ៍យ៉ាងខ្លាំងនៅលើបណ្តាញសង្គម លោកអ៊ាង សុផល្លែត រដ្ឋមន្ត្រីក្រសួងបរិស្ថាន បានចាត់ឱ្យមន្ត្រីជំនាញ រកប្រភពទីតាំង នៃការបង្ហូរទឹកកខ្វក់នោះ និងចុះសិក្សាពីមូលហេតុបន្ទាន់ផងដែរ។

រហូតមកដល់ព្រឹកថ្ងៃទី៣ ខែមេសា ឆ្នាំ២០២៥ ក្រុមការងារនាយកដ្ឋានគ្រប់គ្រងគុណភាពទឹក នៃក្រសួងបរិស្ថាន បានចុះទៅដល់ទីតាំង ហើយបានពិនិត្យពីប្រភពនៃទឹកដែលបានបង្ហូរ និងសាកសួរប្រជាពលរដ្ឋដែលរស់នៅទីនោះផងដែរ។

មន្ត្រីជំនាញ បានរកឃើញថា ទឹកកខ្វក់នេះ មានប្រភពចេញពីលំនៅឋាន ភោជនីយដ្ឋាន និងអគារពាណិជ្ជកម្មក្នុងភូមិសាស្ត្រភូមិ៣ សង្កាត់ជ្រោយចង្វា ខណ្ឌជ្រោយចង្វា។ មន្ត្រីជំនាញ បានរកឃើញទៀតថា ប្រព័ន្ធលូនៅទីតាំងខាងលើ ជាប្រភេទលូរួមរវាងលូទឹកភ្លៀង និងទឹកកខ្វក់ ហើយមិនមានប្រព័ន្ធប្រព្រឹត្តិកម្មទឹកកខ្វក់ សម្រាប់ចម្រោះទឹកកខ្វក់នោះឡើយ។

ទឹកកខ្វក់ពីលំនៅឋាន អាហារដ្ឋាន អគារពាណិជ្ជកម្ម ក៏ដូចជារោងចក្រសហគ្រាសនានា ជាប្រភពដែលបង្ក ផលប៉ះពាល់ដល់ទឹកសាធារណៈ ប៉ះពាល់ការរស់នៅរបស់ប្រជាពលរដ្ឋ និងជីវៈចម្រុះនៅក្នុងទឹកថែមទៀតផង។

ការគ្រប់គ្រងទឹកកខ្វក់ ធានារក្សាឱ្យបានគុណភាពទឹកទន្លេ ស្ទឹង បឹងបួ ត្រូវបានគិតគូរខ្ពស់ពីសំណាក់រាជ រដ្ឋាភិ បាល និងក្រសួងបរិស្ថាន ដែលជាសេនាធិការ។ ការរក្សាបានគុណភាពទឹក គឺទាមទារឱ្យមានការរៀបចំប្រព័ន្ធលូ ប្រព័ន្ធបង្ហូរទឹកកខ្វក់ចេញពីរោងចក្រ សហគ្រាស លំនៅឋាន អាហារដ្ឋាន និងអគារពាណិជ្ជកម្មនានាឱ្យបានត្រឹម បន្ទាប់មក សាងសង់អាងប្រព្រឹត្តិកម្មទឹកកខ្វក់ ដើម្បីចម្រោះទឹកកខ្វក់ទាំងនោះ មុនបង្ហូរចេញទៅទីសាធារណៈ។

លោកអ៊ាង សុផល្លែត រដ្ឋមន្ត្រីក្រសួងបរិស្ថាន បានបង្ហាញការប្តេជ្ញាចិត្តខ្ពស់ក្នុងការរក្សាបរិស្ថានកម្ពុជា ឱ្យល្អស្អាត។ លោករដ្ឋមន្ត្រី បានដាក់ចេញនូវយុទ្ធនាការជាច្រើន ដើម្បីថែរក្សាការពារបរិស្ថាន និងការពារគុណភាពទឹកសាធារណៈតាមទន្លេ ស្ទឹង បឹងបួ។

លោករដ្ឋមន្ត្រី បានអះអាងថា បច្ចុប្បន្ននេះ លោកកំពុងពង្រឹងការគ្រប់គ្រងទឹកកខ្វក់ នៅតាមរោងចក្រ សហnគ្រាសនានា តាមរយៈការកសាងអាងប្រព្រឹត្តកម្មទឹកកខ្វក់ បន្ទាប់មកលោកនឹងបន្តការកសាងអាងប្រព្រឹត្តកម្មទឹកកខ្វក់ ដែលមានប្រភពចេញពីលំនៅឋាន អាហារដ្ឋាន និងអគារពាណិជ្ជកម្មផ្សេងនៅតាមទីប្រជុំជន និងតាមទីជនបទនានា៕